મહાવિદેહ ક્ષેત્રમાં નયસાર નામે એક કઠિયારો રહેતો હતો. તેનો વ્યવસાય જંગલમાંથી લાકડાં કાપી લાવવાનો હતો. એક વખતે પોતાના માણસોને સાથે લઇ તે જંગલમાં લાકડાં કાપવા ગયો. પોતે એક સ્થળે બેઠો અને એના નોકરો લાકડાં કાપી રહ્યા હતા. આમ કરતાં બપોર થઈ. જમવાનો સમય થયો એટલે એક નોકરે આવીને નયસારને કહ્યું. "રસોઈ તૈયાર થઈ ગઈ છે, જમવા પધારો."
નયસાર સંસ્કારી હતો. એને કોઈ અતિથિને જમાડ્યા પછી જ જમવાનો નિયમ હતો. તેથી એ ત્યાં રહેલા તળાવની પાળ પર ચડીને કોઈ અતિથિ આવે છે કે કેમ તેની તપાસ કરવા લાગ્યો. પુણ્યના યોગથી, નયસારની અતિથિને જમાડ્યા પછી જ જમવાની પ્રબળ ભાવના સફળ થઈ.
જંગલની બહારના રસ્તે પવિત્ર મુનિવરોનો સમૂહ એક ગામથી બીજે ગામ વિહાર (ચાલીને જવું) કરી રહ્યો હશે, તેમાં એક મુનિ કે જેમને મહિનાના ઉપવાસનું તપ હતું, તે ચાલતાં ચાલતાં પાછળ રહી ગયા અને રસ્તો ભૂલી ગયા અને જંગલમાં અવળે માર્ગે ચડી ગયા. બપોરના સમયે જ્યાં નયસારનો પડાવ હતો, ત્યાં તેઓ આવી ચડયા. તપસ્વી મુનિને જોઈને નયસારને જાણે રત્નનો ખજાનો મળ્યો હોય એથી એ અધિક આનંદ થયો. એણે હર્ષભેર મુનિની સામે જઈ, વંદન કરી, સત્કાર સન્માન દઈ, આહાર વહોરવાની વિનંતી કરી.
નયસારે તપસ્વી મુનિને આદર-સત્કાર સહિત, ઉચ્ચ ભાવનાથી આહાર વહોરાવ્યો.
મુનિના આહાર ગ્રહણ કર્યા બાદ નયસારે ભોજન ગ્રહણ કર્યું. ભોજન પતાવી એ મુનિને જે ગામ જવું હતું તે ગામે જવાનો માર્ગ બતાવવા સાથે ગયો. રસ્તામાં ચાલતાં ચાલતાં મુનિને વિચાર આવ્યો, "આ મનુષ્યે મને જંગલની ભટકામળમાંથી બહાર કાઢી રસ્તો બતાવ્યો છે. હું એને સંસારની ભટકામળમાંથી નીકળવાનો આત્મહિતનો માર્ગ બતાવું એમ વિચારી મુનિએ નયસાર કઠિયારાને દેવ, ગુરુ અને ધર્મ વિશે સમજણ આપી આત્મસ્વરૂપની દ્રષ્ટિ આપી.
આમ નયસાર કઠિયારાએ તપસ્વી મુનિ પાસેથી આધ્યાત્મિક ધન પ્રાપ્ત કર્યું શુદ્ધભાવથી મુનિના કથનોનું આરાધન કરતાં કરતાં એણે આયુષ્ય પૂર્ણ કર્યું અને બીજા ભવમાં દેવલોકમાં દેવરૂપે જન્મ થયો.
જોયું મિત્રો, ઊચ્ચ ભાવનાથી કરેલાં આહાર દાનનું પરિણામ કેવું ઊંચું આવ્યું ! આત્મદ્રષ્ટિ પ્રાપ્ત થઈ જે મોક્ષે પહોંચાડીને રહે અને બીજા ભવમાં દેવલોકનો વૈભવ ભોગવવાનો આવ્યો.
