દોસ્તો, તમને શાંતિ ગમે છે? જ્યારે આપણે આપણા મિત્રો કે ભાઈ બહેન સાથે ઝગડા કરીએ ત્યારે શું થાય? ઘરમાં કોઈ જ શાંતિ ન રહે, નહીં? આવી જ રીતે જ્યાં સુધી જુદા જુદા ધર્મ વચ્ચે ઝગડા-ઝગડી અને મતભેદ હોય ત્યાં સુધી દુનિયામાં શાંતિ ન થાય! એક એવું મંદિર જ્યાં બધાને શાંતિનો અનુભવ થઈ શકે!
એક એવું ત્રિમંદિર આપણી પાસે જ છે! ચાલો ... આ ભવ્ય મંદિરની એક ભાવ યાત્રા કરીએ અને એના વિશે જાણીએ!
ત્રિમંદિર શું છે ?
આ મંદિરમાં ત્રણ ભગવાનો ની સ્થાપના એક સાથે થઇ છે. શ્રીસીમંધર સ્વામી, શ્રીકૃષ્ણ ભગવાન તથા શ્રીશિવજી.
આ મંદિર કોઈ એક જ ધર્મ માટે નથી ! પરમ પૂજ્ય દાદા ભગવાને આધ્યાત્મિક ક્રાંતિ સર્જીને આ મંદિરની સ્થાપના કરી, જ્યાં ભારતના ત્રણ મોટા ધર્મોનો એક જ મંદિરમાં સમન્વય થાય છે.
- કોઈ એક જ ધર્મનું આ મંદિર નથી(નિષ્પક્ષપાતી) અને તેથી જ એ બધા ધર્મોના મતભેદ ટાળે છે.
- આ મંદિરની સ્થાપના કરવા પાછળ પરમ પૂજ્ય દાદાશ્રીનો એ જ હેતુ છે કે જ્યારે પણ લોકો આ મંદિરમાં આવે અને બધા જ ભગવંતોના દર્શન કરે, ત્યારે તેમનો ધર્મનો મતાગ્રહ દૂર થાય. આવા ત્રિમંદિર ઠેર ઠેર બંધાય, તો દુનિયામાં જરૂર સુખ અને શાંતિ ફેલાશે.
ત્રિમંદિરમાં દર્શન કરવાથી થતા લાભ:
- દેવી દેવોના આશીર્વાદ અને શક્તિઓ મેળવો.
- નિષ્પક્ષપાતી ભાવ રાખીને દર્શન કરવાથી ધર્મના મતભેદ ટળે (મારા-તારી ન થાય).
- આધ્યાત્મિક પ્રગતિ થાય – નિષ્ઠાથી દર્શન કરનારની બધી ચિંતા અને દુઃખો દૂર થાય. તેમની આત્મા સાક્ષાત્કાર અને મોક્ષ તરફ પ્રગતિ થાય.
-
દાદાશ્રીની ભાવના
પરમ પૂજ્ય દાદાશ્રીની એવી ભાવના હતી કે ૨૪ ત્રિમંદિર બંધાય. આજ સુધીમાં ૧૩ ત્રિમંદિર બંધાયા છે અને આ વર્ષે જામનગરમાં એક નવું એટલે કે ૧૪મુ બંધાઈ જશે તેમ જ દિવાળી પછી મુંબઈમાં પણ ૧૫મુ બંધાશે.
-
કોઈ પણ મંદિરમાં જઈએ ત્યારે કેવી રીતે પ્રાર્થના કરવી?
દાદાશ્રી કહે છે કે મંદિરમાં ભગવંતોને પ્રાર્થના કરવી જોઈએ કે “
“વ્હાલા ભગવાન, તમે મારી અંદર બિરાજમાન છો, પરંતુ મને હજી આપની ઓળખાણ પડી નથી, હું અહીં આપના દર્શન કરું છું. જ્ઞાની પુરુષ, દાદા ભગવાને મને આ રીત શીખવી છે અને હું તેમના માર્ગદર્શન પ્રમાણે આપના દર્શન કરું છું. આપ મારા પર એવી કૃપા વરસાવો કે જેથી મને આત્મસાક્ષાત્કાર થાય.”
